2019-yil 22-may O‘zbekiston Respublikasi Bandlik va mehnat munosabatlari vaziri Sherzod Kudbiyev O‘zbekistonda aholi bandligini ta'minlash va yangi ish o‘rinlarini tashkil etish bo‘yicha 2019-yilning birinchi choragida amalga oshirilgan ishlar yuzasidan O‘zbekiston Respublikasi Oliy Majlisi Qonunchilik palatasi Mehnat va ijtimoiy masalalar qo‘mitasi kengaytirilgan yig‘ilishida hisobot berdi.

Yig‘ilishda deputatlar, ekspertlar, vazirlik mas'ul xodimlari va OAV vakillari ishtirok etdi.

Hozirgi kunda mehnatga layoqatli aholi soni – 18 954 ming (o‘sish - 1,0 foiz), band aholi soni – 13 376 ming (o‘sish - 1,3 foiz) nafarni tashkil etadi. Rasmiy sektorda bandlar – 5 403 ming kishini tashkil etib (o‘sish - 3,4 foiz), rasmiy bandlikning umumiy bandlikdagi ulushi 40,5 foizni tashkil etmoqda. Iqtisodiyotning norasmiy sektorida bandlar – 7 964 ming (59,5 foiz), shu jumladan, xorijda ishlayotganlar – 2 365,4 mingni tashkil etadi.

Joriy yil birinchi chorakda ishsizlik darajasi 9,4 foizni tashkil etdi (o‘tgan yil shu davrda - 9,7 foiz), 30 yoshgacha bo‘lgan yoshlar orasida – 15,3 foiz, ayollar orasida – 13 foiz. Eng yuqori ishsizlik Qoraqalpog‘iston Respublikasi, Andijon, Qashqadaryo, Samarqand, Sirdaryo va Farg‘ona viloyatlarida (9,7 foiz) qayd etilgan. Ishga muhtoj aholi soni – 1 million 391 ming kishi.

Hisobot doirasida O‘zbekiston mehnat bozorining holati, ishga joylashtirish, yangi ish o‘rinlarini tashkil etish bo‘yicha ilk bor joriy qilingan davlat buyurtmasi mexanizmi, mehnat migratsiyasi, kasbga o‘qitish va tayyorlash, mehnat bozoridagi faol siyosatni moliyalashtirish va xususiy bandlik agentliklari faoliyatiga doir so‘nggi uch-to‘rt oyda amalga oshirilgan ishlar tahliliy-tanqidiy yoritildi.

Hisobot yakuni bo‘yicha deputatlar, shu jumladan, Oliy Majlis Qonunchilik palatasi Mehnat va ijtimoiy masalalar qo‘mitasi raisi o‘rinbosari Mavluda Xo‘jayeva Bandlik va mehnat munosabatlari vazirligi tomonidan so‘nggi davrda sezilarli ishlar olib borilayotganini e'tirof etdi. Shu bilan birga, yig‘ilishda mehnat sohasini yanada takomillashtirish yuzasidan tegishli taklif va mulohazalar bildirildi.