2022-yil 24-oktabr kuni ijtimoiy tarmoqlarda “shaxsiy ma’lumotlar Bandlik va mehnat munosabatlari vazirligining “Elektron mehnat daftari” telegram guruhida tarqatilayotgani” haqida xabar berilgan.

Maqolada foydalanuvchilar ushbu guruhga fuqarolarning shaxsiy maʼlumotlarini aks ettiruvchi fotosuratlar va skrinshotlar joʻnatishlari hamda bu holat tajovuzkorlar tomonidan fuqarolarning shaxsiy maʼlumotlarini qoʻlga kiritish va undan shaxsiy manfaat yoʻlida foydalanish yoʻliga aylanishi mumkinligi haqida maʼlumotlar bor edi.

 “Elektron mehnat daftari” guruhi ma’muri hisoblangan “YaMMT” IDAKni boshqarish direksiyasi O‘zbekiston Respublikasi Prezidentining 2019-yil 31 oktabrdagi “Yagona milliy mehnat tizimi» idoralararo dasturiy-apparat kompleksini joriy qilish chora-tadbirlari to‘g‘risida”gi PQ-4502-son qaroriga muvofiq tashkil etilgan.

Direksiyaning asosiy vazifalari quyidagilardan iborat:

• ish beruvchilar tomonidan mehnat shartnomalarining o‘rnatilgan tartibda ro‘yxatdan o‘tkazilishini monitoring qilish, mehnat shartnomalarini ro‘yxatdan o‘tkazishda ish beruvchilar va xodimlarga texnik yordam ko‘rsatish;
• “YaMMT” IDAKni qo‘llash, elektron mehnat daftarchasini shakllantirish va joriy qilish, xodimning mehnat staji to‘g‘ri hisoblanishini ta’minlash jarayonida yuzaga keladigan barcha masalalar bo‘yicha ish beruvchilarga texnik va axborot ko‘magini taqdim qilish, shuningdek, “YaMMT” IDAK foydalanuvchisi hisoblangan fuqarolarga axborot ko‘magini ko‘rsatish;
• joriy etilayotgan mehnat shartnomalarini ro‘yxatdan o‘tkazish va elektron mehnat daftarchalarini yuritish tartibini tushuntirib beruvchi, “YaMMT” IDAKni rivojlantirish va takomillashtirish istiqbollari haqida materiallar tayyorlash va ommaviy axborot vositalarida chop etish, teleradiokanallarda maxsus teleko‘rsatuvlar va radioeshittirishlar tashkil qilish.

Ushbu vazifalar, shuningdek, tizim bilan ishlashda ish beruvchilarni qo‘llab-quvvatlash bo‘yicha majburiyatlarni bajarish maqsadida 71 200 70 30 raqamida hamda telegram messenjerida guruh tashkil etilgan.

Bugungi kunga kelib “Elektron mehnat daftari” guruhi a’zolari soni 21 364 nafarga yetgan bo‘lib, bu guruhga kuniga taxminan 200 ta yaqin murojaatlar kelib tushadi va ko‘rib chiqiladi. Direksiya operatorlari kun davomida guruhga kelib tushadigan murojaatlarni, hamda telefon orqali qabul qilingan qo'ng'iroqlarni qayta ishlaydilar.

Ish beruvchilar va jismoniy shaxslarga tezkor va sifatli yordam ko'rsatish uchun saytdagi xato yoki nomuvofiqlikni aks ettiruvchi ekrandan skrinshot yoki fotosuratni so'rash zarurati tug'iladi.

Ko'pincha foydalanuvchilar skrinshotlar, fotosuratlar, fuqarolarning shaxsiy ma'lumotlarini o'z ichiga olgan hujjatlarni yuboradilar.

Foydalanuvchi tomonidan yuborilgan, shaxsiy ma’lumotlarni o‘z ichiga olgan skrinshotlar nazoratga olingan bo‘lib, foydalanuvchiga yordam berilgandan keyin skrinshotlar muntazam ravishda o‘chirilib boriladi va bu bo‘yicha barcha operatorlar xabardor qilingan. 

Elektron mehnat daftarchalarini yuritish tashkiliy-huquqiy shakli va idoraviy bo‘ysunishidan qat’i nazar, barcha ish beruvchilar uchun majburiy ekanligini hisobga olgan holda, tizim foydalanuvchilari kontingenti davlat tashkilotlarining kadrlar xizmati mutaxassislaridan boshlab kichik firmalarni ham o'z ichiga oladi. Ular orasida jo'natilgan fotosuratdagi shaxsiy ma'lumotlarni yashirish uchun yetarli kompyuter ko'nikmalariga ega bo'lmagan foydalanuvchilar ham bor.

Shunga qaramay, har doim foydalanuvchilar shaxsiy ma'lumotlarni o'z ichiga olgan hujjatlarni yuborish oqibatlari haqida xabardor qilinadi.

Shaxsiy maʼlumotlarga oid maqola bilan bogʻliq ushbu hodisadan soʻng guruhdagi barcha rasm va skrinshotlar o‘chirildi, guruhga yuborilayotgan maʼlumotlar ustidan nazorat yanada kuchaytirildi va operatorlar oʻrtasida tegishli tushuntirish ishlari olib borildi.

Bandlik va mehnat munosabatlari vazirligining ma’muriyati foydalanuvchilarga bandlik sohasidagi tizimlarga e’tibor qaratib, o‘z fikrlarini bildirib kelayotgani va kelgusida mavjud kamchiliklarni bartaraf etishda ko‘maklashayotgani uchun chuqur minnatdorchilik bildiradi.