СОVID-19 инфекцияси тарқалишининг олдини олиш учун жорий этилган карантин ва чекловларнинг аҳоли даромадлари кескин камайишига таъсир қилишининг олдини олиш ва камбағалликни қисқартириш мақсадида Бандликка кўмаклашиш давлат жамғармаси ҳисобидан вақтинча ишсиз бўлган фуқаролар бандлигини таъминлаш учун субсидиялар ажратилмоқда.

Мазкур жараён Самарқанд вилоятида кенг кўламда йўлга қўйилган. Бандлик ва меҳнат муносабатлари вазири ўринбосари Нодир Якубов айни йўналишда амалга оширилаётган ишлар билан танишиш мақсадида вилоятнинг Пайариқ, Иштихон ва Каттақўрғон туманларида бўлди.

Мазкур ҳудудларда истиқомат қиладиган 2.5 мингга яқин фуқарога 1 миллиард 200 млн сўм миқдордаги субсидия иссиқҳона ўрнатиш, уруғлик ва кўчат, суғориш воситаларини сотиб олиш ҳамда ўрнатиш, шунингдек жамоатчилик ишларига жалб этиш учун ажратиб берилди.

Шу билан бир қаторда, мазкур туманларда ташкил этилган кооперативлар орқали аҳоли бандлиги таъминланиб, камбағалликни камайтириш чоралари кўрилмоқда. Хусусан, Пайариқ туманида узум-мева етиштиришга ихтисослаштирилган кооперативда 31 нафар фуқарога 1 га дан ер майдони ажратилган.

Иштихон туманидаги кооперативнинг 14 га ер майдонида 70 нафар фуқаро уруғлик-мева кўчатлари экиш ишлари билан шуғулланмоқда.

Шунингдек, Каттақурғон туманида 15 га ер майдонида ташкил этилган кооперативда 60 нафар ишсиз фуқаро қулупнай етиштириш билан банд қилинган.