Тошкент шаҳрида доимий фаолият олиб борувчи марказ ташкил этилмоқда

16.11.2020

Ўзбекистон Республикаси Бандлик ва меҳнат муносабатлари вазирлиги ҳамда Тошкент шаҳар ҳокимлиги билан ҳамкорликда Тошкент шаҳрининг марказида жойлашган доимий фаолият олиб борувчи меҳнат ярмаркаси ўтказиладиган марказни ташкил этиш режалаштирилган эди. Бандлик ва меҳнат муносабатлари вазири Нозим Хусанов мазкур объектда олиб борилаётган таъмирлаш ишлари билан танишди.

Эътироф этиш жоизки, Тошкент шаҳрида ўтган давр мобайнида пандемия чекловларига қарамасдан, карантин оқибатида фаолияти тўхтаб турган 850 дан ортиқ корхона фаолияти қайта тикланди.

Шу билан бирга, 45,1 минг янги иш ўринлари ташкил этилди. 22,2 минг нафар фуқаролар Аҳоли бандлигига кўмаклашиш марказларига мурожаат қилган бўлиб, уларнинг 6,9 минг нафари мақбул келадиган ишга жойлаштирилди, 1,5 минг нафари касб-ҳунарга ўқитиш учун йўлланмалар берилди, 6,9 минг нафари жамоат ишларига жалб этилди, 1,9 минг нафарига ишсизлик нафақалари тайинланди.

Аҳоли бандлигини таъминлашнинг самарали механизмларидан бири бўлган “Бўш иш ўринлари меҳнат ярмаркалари” ҳудудий туманлар бўйича 30 маротаба ташкил этилди. Бунда туманда банд бўлмаган фуқаролар айниқса ёшларнинг бандлигига кўмаклашиш, уларнинг меҳнат бозоридаги касбларга йўналтириш юзасидан ўтказилган бўш иш ўринлари меҳнат ярмаркасига жами 8,3 минг нафар фуқаролар жалб этилиб, шундан 1,5 минг нафарига ишга жойлашиш учун йўлланмалар берилди, 221 нафари касбга ўқитиш, қайта ўқитиш курсларига юборилди, 98 нафари эса хақ тўланадиган жамоат ишларига жалб этилди, 6,5 нафарига (3,1 минг нафар аёллар, 2,8 минг нафар ёшлар) турли йўналишларда маслаҳатлар берилди.

Ўзбекистон Республикаси Бандлик ва меҳнат муносабатлари вазирлиги, Тошкент шаҳар ҳокимлиги, Халқ депутатлар Кенгаши, Прокуратура ва Тошкент шаҳар Бандлик бош бошқармаси биргаликда пандемия даврида ишсиз қолган аҳолини иш билан таъминлаш, жамоат ишларига жалб этиш, турли касб-ҳунарларга ўқитиш натижасида ишсизлик даражаси 3 фоизга камайтирилиб, қарийб 40 мингга яқин аҳоли бандлигини таъминлашга эришилди. Жорий йилнинг 9 ойи мобайнида шаҳарда ишсизлик даражаси 9,1 фоизни ташкил этди. Ушбу ташкил этилаётган жаҳон стандартларига мос “Меҳнат бозори” маркази ҳар кун мурожаат қилаётган ишсиз ва банд бўлмаган 250 нафаргача бўлган фуқароларни кунлик иш билан таъминлаш, касб-ҳунарга йўналтириш, жамоат ишларига жалб этиш ва охир-оқибат уларнинг бандлигини таъминлаш имконини яратиб беради.